序。一起尋找東涌之美…
各位團友好耐冇見啦😝自從上年12月嘅單車週末聚之後已經有半年無正正式式咁搞過 #單車活動聚🥹 黎緊今次我地會同大家來到東涌，以「尋找東涌之美」為主題，盡情探索呢個遠離煩囂既單車小城。東涌有各種不同既歷史文化景點，亦有風景優美既打卡勝地。我地會分為上午場「竹林深處人家」及下午場「直到跑到的盡頭」，同大家一一探索區內所有值得拜訪既景點！
上午場 「竹林深處人家」🎋
10am – 2pm
以「尋幽探秘」為主題，團長會同大家走訪多個區內充滿歷史文化古跡的景點。
預計行程：
1000 出發@東涌站 （0945 集合）
1015 赤鱲角海邊巴士站🚌
1030 白日之觀景山🏔️
1130 馬灣涌村碼頭 & 天空之城* （步行路段）🛶
1200 飲品&輕食補及@ 逸東村（自費）🍨
1245 侯王廟 & 東澳古道 🚴🏻♂️🌿
1300 隱世䃟頭村*🌃
1300 東涌炮臺💣
1400 終點 @ 東涌站 🏁
(約 14km)
*為本場獨有景點
（行程只供參考，或會因天氣或現場實際情況有所更改，以活動當日為準）
下午場「直到跑道的盡頭」🌅
3-7:30pm
以「日落美景」為主題，先和大家在東涌區內漫遊一番，然後再於黃昏時分踩往機場跑道尾捕捉日落*。
預計行程：
1500 出發@東涌站 （1445 集合）
1515 東涌炮臺💣
1545 侯王廟 & 東澳古道 🚴🏻♂️🌿
1615 小休補及@ 逸東村（自費）🍨
1715 午後之觀景山🌄
1745 赤鱲角海邊巴士站🚌
1815 水底碼頭&機場維修區*🛫（馬路路段）
1930 終點@東涌站 🏁
(約 17km)
*為本場獨有景點
（行程只供參考，或會因天氣或現場實際情況有所更改，以活動當日為準）
活動景點一覽
兩場都會去😽
赤鱲角海邊巴士站
話明同大家尋幽探秘，當然要去一啲偏門/大家可能未必去過既地方。
赤鱲角巴士站位於一個無人知曉既海邊，路過驟眼看上去可以話好不起眼，但如果打卡影相又會有出乎意料既效果。團長試路當刻正值天陰密雲，但影出黎既相都好有氛圍。期待同大家去個陣會係藍天白雲，波光粼粼。
觀景山
（需登山步行，約 15-20分鐘）
呢座係我地揾到難得適合係活動途中行既山。
登上觀景山只需 15-20 分鐘，但可以欣賞既美景絕對物超所值。登山途中會經過充滿植物既小徑。山上有個涼亭，可以270度飽覽機場、屯門、東涌以及昂坪纜車既壯闊景色。
侯王古廟
(二級歷史建築)
屬於香港二級歷史建築，係東涌區內一個幾隱蔽但值得推介既景點。侯王廟位於東澳古道既入口，有接近 260 年既歷史。相傳為左供奉南宋名臣楊亮節而從九龍城侯王廟請來，以求制服瘟疫而起。每年農曆八月十八日都會有盛大慶祝活動~
侯王橋
侯王橋位於侯王廟附近，坐擁整個鳳凰山及大東山作為背景。天氣好既時候，可以拍攝到無與倫比既山河美景。
侯王橋係居民出入既要塞，亦係東澳古道既起點，由呢度開始，大家將會不時見到居民踩著單車係身邊穿過。侯王橋附近同時亦有一個紅樹林入口，係潮退時可以見到極度珍貴既生態畫面。
東澳古道小田園
東澳古道係當區非常著名既通道，顧名思義，就是接駁東涌同大澳既一條古道，全長大約 15km。今次活動我地唔會同大家踩曬成條古道，因為如果要踩的話可能需要花上大半日😹
上午場我地會同大家踩一段入到去䃟頭村，下午場我地會來到小田園同大家感受一下原野風光。
東涌炮台
(法定古蹟)
東涌砲台係東涌區內兩個法定古蹟其中之一。雖然團長已經黎過好幾次，亦覺得呢度好靚，但每次黎既時候都幾乎無其他遊人。東涌砲台同時亦係東涌鄉事委員會 同東涌公立學校（已停辦）既所在地，兩個建築既外表都極有特色。
東涌砲台仲有一個別名 – 東涌寨城。
逸東村60s「香港街市」
逸東邨位於東涌沖舊碼頭附近，入面有個以仿60年代九龍城風貌設計既懷舊街市。街市附近佈滿左好多懷舊物件，例如人力車、老街路牌同皇冠郵筒、舊日既海報等等。係本地極少數一個咁樣主題風格既街市。
兩場活動我地都將會係呢度休息&補及。
上午場獨有🏞️
䃟頭村
坐落係東涌古道約 15 分鐘單車程，有超過300年 既歷史。
䃟頭村比人感覺純樸，充滿田園氣息。村入面有間士多，可作我們休息補及之用。村內居民不喜歡受到打擾鐘意寧靜，但對外來經過的旅客保持友善。
為咗活化村莊以及保留歷史文化，村內設立了農家生活館。
天空之城 (東涌小炮臺)
(法定古蹟)
位於馬灣涌村碼頭附近，就係有住港版「天空之城」之城既東涌小炮台。同大炮台一樣，「天空之城」有超過 200 年歷史，主要係由花崗岩砌成嘅護城牆。因為個樣似宮崎駿電影「天空之城」，所以就被冠名為「東涌天空之城」。呢度係東涌區內兩個法定古遺之一，人煙雖少但極具歷史價值。
東涌舊碼頭
深藏於馬灣涌村內一個不為外人所熟知嘅碼頭，因為外觀上佢唔係一個令人歎為觀止既碼頭（只限陰天）。遠看能夠見到昂坪纜車、飽覽整個東涌灣既景色。
黎呢度要碰啲運氣，如果天氣好個陣絕對可以令你流連忘返。
碼頭充滿左特色嘅3D地畫，記錄左豐收的海產漁獲，係打卡影相嘅一個景點。
馬灣涌村
要講歷史，馬灣涌村其實應該係本次活動最悠久既地方。據說隋朝就已經有人係度居住（1000 年歷史）。
馬灣涌村有「小大澳」之稱，係昔日東涌最繁榮嘅漁村。雖然依家住喺村內的居民人數唔太多，但依然可以感到生氣勃勃，步行係村入面絕對會感受到一番獨有氣息。
下午場獨有🌅
機場跑道尾
機場跑道尾係東涌可以話必去既打卡聖地。5 年前我地曾經同大家踩過去一次。個次未有機會同大家睇到日落。六月係香港既雨季，氣候飄忽，希望到時好運可以同大家一齊睇到美麗既日落。
導航燈塔橋
位於機場跑道尾馬路對面，係另一個東涌獨有既景點。
機場跑道尾向一個方向，導航燈塔橋就對住令一個方向，各有特色，影相出黎感覺完全不同。另外，燈塔橋為飛機升降提供重要既指示，運氣好既話，呢度亦係可以近距離看到飛機升降既最佳位置
水底碼頭
位於南環路上既一個海邊碼頭，係一個極度神秘既景點。潮退既時候可以睇到成個碼頭露出，網上對於其歷史背景及作用的資料不多。
南環路の草坪
一個少人提及既草坪，但我相信係一個大家經過會想停低駐足一番既草坪。草坪位於前往機場跑道尾既南環路上，靠近鐵絲網可以近距離觀看到運行中既飛機
活動特色
日本 tokyobike
所有單車均為日本 @tokyobike.hk，又靚又好踩，改變你對單車既睇法！
輕鬆悠閒踩
踩單車唔一定要比賽競速鬥快，讓我地一齊輕輕鬆鬆，放空一個週末！
攝影打卡，記錄香港景點
踩單車打卡影靚相是常識吧，等我地帶大家一齊去不同景點，做大家半日既攝影師！
認識不同朋友
透過踩單車，大家可以認識有共同興趣既朋友，打開生活既不同可能！
活動詳情
報名時間表
開始接受報名時間：即日開始 額滿即止
活動 briefing 將會於活動 2 日之前send 出~
如有任何問題，歡迎直接 whatsapp 97811769
**報名後你將會即時收到 email autoreply 以示你填寫的 email 正確，如果收不到，請先檢查 JUNKBOX 或 垃圾郵件
**如果仍是找不到，那代表你有可能填錯 email，你可以選擇重新再填表一次，或 whatsapp 我們查詢（93128538）。
常見問題：
如果係單車新手可唔可以參加？
可以，最緊要係你可以穩定咁操控單車。
如果你剛學識踩單車，或者經驗尚淺，建議你可以參加上午場（主要係單車徑進行，較為輕鬆）。
我有興趣想來，但好多年冇踩單車，會唔會唔適合參加這個活動？
如果你好多年無踩，或者唔太記得點踩。建議你可以係活動前揾機會去練習下，攞返個手感。幾多年無踩過唔係重點，關鍵係你能夠穩定咁操控單車🙌🏻
我係新手，未黎過你地活動，你地踩得快唔快？速度上會唔會跟唔上？🙈
我地既速度其實係以龜速🐢進行，慢係我地既一大原則😆（係路段許可既情況下）。因為我地主要都係踩單車徑，同埋如果落斜路既話，我地會要求只可剎車，不可加速，一定要好慢咁落。上斜既話我地亦會建議團友落車慢慢推，唔使心急，保留體力~ 當然你踩到既話歡迎隨便🤗
基本上我地都係盡量以最慢，最安全既速度咁去踩既👌🏻
我係新手，未黎過你地活動，自己一個來會唔會好尷尬🫣
我地好歡迎新朋友一起來參加我地既活動，一個人來係好常見的，唔使覺得尷尬😙 一個人就有機會慢慢認識其他團友~ 當然尷尬與否都要睇你自己，如果到時真係揾唔到人傾偈，就跟住團長慢慢踩啦🤣
可以直接租借你地既 tokyobike 來練習嗎?
可以啊，我地係將軍澳有提供 tokyobike 租借服務，踩既單車正正係活動當日會踩既單車。你可以直接熟練一下。如果你報名參加活動，租借單車可獲 8 折優惠👌🏻
（tokyobike 租借網站）
今次呢條路線難唔難？
兩條路線其實都唔算難，唔算複雜。
上午場主要係單車徑踩，係區入面遊走。
下午場就有唔同，除左係單車徑之外，仲會踩馬路入機場跑道尾，入機場呢段主要係直路。由於呢段係馬路，所以要求會比上午場較高，要有足夠單車經驗既人先可以參加。
如果你係新手，請參加上午場👆🏻
我見下午場會踩馬路入機場跑道尾，但我未踩過馬路，我可以參加嗎？
可以，重點係請確保你自己能夠穩定操控單車，並且遵守所有交通規則，有良好安全及態度。另外亦要遵照現場工作人員既指示。
活動一定要佩戴頭盔？
無錯，為保障大家既安全，雖然我地既速度好慢，不過所有參加者均需佩戴頭盔。
如果無頭盔怎麼辦？
我地會為每位參加提供頭盔🪖
如果當日天氣惡劣/落雨既話如何處理？
如果出發前落大雨，我地會係活動出發前最少 2 小時前通知改期。
如果係驟雨/ 或者出發途中落雨，我地會如常舉行。
如果踩既途中落雨，我地會等停雨再慢慢繼續行程。
值得一提是夏天是雨季，天氣變化較大，除非天文台事先已經預測會整日落雨，否則如果係局部地區性驟雨我地一般會繼續進行，團友報名時請留意。
如果活動改期而你未能出席，你可以選擇退款。
報名後如果想取消怎麼辦，可以退款嗎？
除非因天氣導致活動改期，否則我地所有報名費不設退款。
如果你報名後來不到，你可以找朋友頂替。
如果沒人頂替，你可以保留名額 60日。
活動主旨
我們希望透過悠閒的單車聚會，在香港帶來一種以 lifestyle 為主的單車生活文化。我們每次都有不同的內容和路線，我們的 dress code 是不穿比賽服飾，大家來的時候只需穿日常運動服/生活服/出街衫便可，大家自己覺得舒服適合安全就好。我們相信如果你穿的輕鬆，你的踩車的時候心態就是輕鬆。重點不是你踩的是什麼單車，而是你踩的時候是否抱著一種輕鬆悠閒，令你快樂，令你對身處於的環境更願意用心細看的心境。這種心情相信大家去旅行的時候都感受過。有興趣的朋友、喜歡踩單車的朋友就來和我們一齊嘗試把這種模式帶到香港，一齊嘗試將單車在這個城市扮演的角色慢慢改變。
活動氣氛節奏
我們的聚會是輕鬆悠閒為主，車速大概是 10﹣15km （或按情況加減），中間會有數個休息停頓hea位比大家休息、影相、互相認識和聊天等。速度和距離並不是我們的重點，最緊要是大家感受到單車帶來的樂趣，嘗試接觸 urban cycling 、 bicycle lifestyle 的文化。
目標客群
本次活動於市區進行，途中將會經過大量行人路需要落車推車、長時間等候紅綠燈、並且會遇到其他無數因為安全理由而需要落車推車步行既時候。本次活動之目標客群為有興趣細心於市區漫遊、以另一角度感受/觀看我城的非專業單車使用者/追求全程享受高速順暢進行之族群。為免於完成活動之後感到失望，如有任何問題敬請事先查詢，報名時敬請留意。
適合/建議你同我地一齊來玩，如果你是…
-踩單車第二，享受過程第一的人😉
-明白/能夠接受於市區踩單車需要不時等紅綠燈的人🙇🏻♂️
-明白/能夠接受本組織舉辦之活動會以安全為首要考量，因此不時因應實際路面情況而需要落車推車行行人路的人🙇🏻♂️🙇🏻♂️
-樂於係市區漫遊穿梭探索的人🤓
-樂於與其他參加者互動/認識新朋友的人😚
-喜歡抱著嘗試新事物心態的人🤗
不適合/不建議，如果你…
-因為任何說不出的原因而被迫出席🫢
-諗住條路會好順好好踩好暢通，唔預期需要停車落車推
🎬安全單車短片
以下有兩條運輸處製作有關單車安全的短片，請大家出發務必觀看和了解：
1 騎單車基本技巧（上/ 下午場的團友都要睇）
https://www.youtube.com/watch?v=TjUf843vfJk
2 實戰篇：馬路上（參加下午場的團友必睇）
路線描述及安全指引
本日活動有上下午兩場，兩場路線主題及路線均有一定程度的不同。大家報名前請細閱以下詳情：
上午場-「竹林深處人家」
本路線有 4 種不同路段，大致分佈和描述如下：
1）單車徑 70%
我地主要會沿著單車徑於區內遊走，拜訪各個主要景點。單車徑上有各種交通規則依然要遵守，並且需要注意騎乘安全及其他路人。請大家出發前參閱運輸處的安全指引：
2）行人路推車 15%
主要係由赤臘角南路到前往赤臘角海邊巴士站以及登山觀景山往返的這一段。由於這段是行人路，故此大家需要落車推車。
3）馬灣涌村步行 10%
進入馬灣涌村及前往天空之城時，我們會將單車泊在村口，再步行入內，以免造成擠迫及對其他途人/村民造成不便。大家於到訪時亦應時刻保持安靜，不可對任何人造成滋擾。
4）步行登山 5%
我們會將單車泊係山腳，然後步行登上觀景山（約 500 米/ 880 級）。
下午場-「直到跑道的盡頭」
本路線主要有 4 種不同路段，大致分佈和描述如下：
1）馬路路段 45%
在進入機場跑道尾的南環路段，我們將需要按照交通法例於馬路上騎行。此段路線主要為單程直路。視乎到時參加者人數，我們將會分開小隊進行。該路段交通一般不算繁忙，但由於行車線不是特別闊，加上會有巴士、泥頭車或其他大型車輛行走，為安全起見，到時我們有可能會於後方車輛駛到時稍作停頓讓其超越我們隊伍後，再繼續前進。另外，若果我地係現場發現任何團友有危險，或者單車程度不適宜踩該馬路路段，我地將會安排工作人員帶領有關團友在行人路以步行方式進入。
回程時我們需要經過2個回旋處，到時我們會視乎情況採取最安全既情況前進，包括上行人路推車及於沒有車輛駛過時才前進。
2）單車徑 40%
我地主要會沿著單車徑於區內遊走，拜訪各個主要景點。單車徑上有各種交通規則依然要遵守，並且需要注意騎乘安全及其他路人。請大家出發前參閱運輸處的安全指引：
3）行人路推車 10%
主要係由赤臘角南路到前往赤臘角海邊巴士站以及登山觀景山往返的這一段。由於這段是行人路，故此大家需要落車推車。
4）步行登山 5%
我們會將單車泊係山腳，然後步行登上觀景山（約 500 米/ 880 級）。