google map 詳細遊記路線
序
話說將軍澳真係一個非常適合踩單車既地方。當然，如果要同大圍沙田既傳統單車徑相比，係無佢地咁長有城門河，吐露港咁靚咁地標性。不過將軍澳有將軍澳既吸引力，同你去沙田大埔踩個感覺係唔同的~
1 如果論人既密集程度來講，將軍澳既單車徑係比較少人 d，舒服 d。假日個陣雖然都會多人，不過應該無沙田咁誇張。
2 將軍澳有自己獨有既特色：跨彎大橋 & 將軍澳海濱，感覺同沙田主要係野外景觀有唔同，加上我地既遊記介紹，你會發現好多有隱世影相打卡靚位。唔一定次次都要踩沙田~
3 呢度有我地既靚單車可以租借🤪 絕對係一大吸引力！
我地本身有左一個簡易版既遊記，主要都係幾幅相為主，過左幾個月之後，我地對呢區研究深入左，所以寫多一個詳細版既遊記，希望可以同區內區外既人分享。就算大家本身可能已經有自己單車，都可以感受呢區既特色！
將軍澳 海濱長廊
將軍澳海濱長廊可以說是區內必去既景點，亦是指定必去的地方（基本上你唔可以避得開呢度）。整個海濱都被單車徑連貫著。如果由我地 pop up store 租完單車，基本上 3 分鐘一出就係海濱。
海濱一帶有好多特色餐廳（不過都係西餐cafe 酒吧為主）。大家有興趣我地覺得絕對可以去 chill 一 個下晝，因為對住個海，如果天氣好既話係覺得會好似去左旅行咁舒服。日落時候呢度亦非常靚，可以邊吹著海風，邊欣賞著慢慢漸變既magic hours。
不過呢個景點基本上唔使我地介紹，你只要去踩單車既話一定會經過。唯一要注意既地方係下晝既時候呢度會非常多人。如果大家想避開人潮既話，可以早少少11 am-2 pm呢d 時間黎，趁大家都仲未食完 lunch出動😹
跨彎 蝴蝶橋
相信呢條橋都唔使講太多，可能大家會想入黎將軍澳踩單車既其中一個主因，都係因為係上年2022年尾呢條「蝴蝶橋」開左。 沿著上面講既海濱長廊，無論你往左還是往右，最後你都會踩到上橋。如果由我地pop up store 出發，大約 10-15 分鐘不停直踩就會來到橋頭。
相信大家都估到，呢條橋如果係日頭再加上好天既話，橋基本係非常多人😹 企係橋最高既部分，你可以遠眺整個將軍澳海濱長廊，當然亦都可以食下海風，非常舒服 😹 不過要留意既係，如果遇到強烈季候風（達到 40km 以上既時候）橋係會封閉的，咁亦都係為左大家安全，因為打風既話真係連人帶車可以成個吹得動。基本上如果係好天既話，橋上有好多位打開影相都靚，重點係你要揾到一個最少人既 background。
峻瀅 後山草原
將軍澳其實唔止淨係得海濱可以踩，其實入面仲隱藏左好多好玩既地方。峻瀅 後山草原就係其實一個非常唔起眼，但我地覺得其實係必去既地方。一來呢度無乜人，二來呢度其實影相非常之靚。呢度甚至可以話唔受天氣影響，點解咁講呢？ 因為好天當然唔使講實好玩，但如果陰天煙雨矇矇反而影出黎既相仲更加有 feel😽
唯一大家要注意既係，因為呢度係放狗勝地，所以有好多好多地雷，大家千期一定一定要小心🥹
日出康城瀑布
其實都係屬於同一個地點，不過就收埋係草原小路既盡頭，只要一直沿著小路盡頭入去，大概 5-10 分鐘左右就會到達。其實呢度只係一個迷你的小瀑布，不是什麼雄偉的景色，大家也不用太高期望，當係一個小 checkpoint 就可以了。聽說平時來呢度既話可能很大機會有人聚集開派對，所以如果前往的話做定心理準備🫢
將軍澳南海濱長廊、打卡小天橋、調景嶺碼頭
從日出康城返回將軍澳的方向，就會經過南邊的海濱長廊，這裡相信不用特別教大家去，因為沿著單車徑踩都一定會經過。呢度沿途可以遠眺對岸的景色，都算頗為漂亮和舒服。除左海濱長廊，不要忘了在行人天橋上亦可以稍作休息以及欣賞兩岸風光。當然還可以打卡留念~
而橋的另一端就是調景嶺碼頭。因此兩邊都有 d 景色睇下，所以這裡是個每次我地踩單車/搞活動既時候都會停低既地方 🤓
Green Field 小草原
這個位於將軍澳住宅區內的小草原，其實令我們又愛又恨。愛的地方是它其實有它美麗的一面，尤其在陰天煙霧瀰漫的時候；而恨的一面，就是當好天的時候，這裡基本上佈滿附近居民的衣物和被鋪。所以反而是陰天可能會拍出十分有氛圍的照片，而好天的時候卻因為天氣太好而四處掛滿衣襪。撇除這些，這裡其實是挺好玩又舒適的地方。我地每次活動如果經過大家都幾鍾意呢度，同埋呢度都可以野餐~
如果大家唔想咁隔涉，同埋乾淨 d 既話（想比起峻瀅後山既草原），呢度會係唔錯既選擇！
寶林的林蔭單車大道
其實呢個並唔係一個指定既景點，我地想介紹既係你係寶林附近一帶踩既路，都寫類似咁樣兩旁種滿樹既林蔭小道。我地覺得都算係一個「特別地帶」。呢段路唔會好長，大家 15-20 分鐘左右，包住成個寶林既外圍。呢一段單車基本上係唔會人潮湧湧，就算咩時候都係，因為佢主要係服務區內既居民，不過居民唔多踩😂
所以~~如果係想影相既話，呢個又係一個好地方，認真~~ 同埋我地之前搞活動每次經過都幾舒服，好明顯係感覺到 d 空氣係特別清新~😄
寶林村& 阿波羅雪糕屋
阿波羅呢 d 兒時回憶相信大家都唔陌生，佢既雪糕屋唔係周圍都有，難得係將軍澳（寶林村）有我地就唔放過。另外呢度亦可以當做一個休息位，因為呢度有洗手間、餐廳、便利店等等，就算唔食雪糕，都可以慢慢hea 下休息下。寶林村算係舊式小屋村，所以都算係一個特色小景點啦~
常寧街 歐陸風白色隧道
常寧街遊樂場雖然從外看起來不算起眼，不過呢度其實隱藏左一個打卡勝地，就係充滿歐陸風格既白色隧道柱陣。呢個位置基本上十分少人，大概附近既街坊都唔覺得有咩特別，不過對我地黎講正好就是一個打卡勝地~ 我地一向最鐘意就係一 d 唔太熱門，但又靚又少人，可以舒舒服服慢慢坐下影下相得黎，唔會太異相😹 有單車徑可以到達既咁就 perfect ~
大家記得因為都係康民署管轄既公園，所以記得要落車推車入去！做個乖乖既單車髦民。🫰🏻
中式庭院風的 文曲里公園
去完常寧街歐陸式風格既公園，緊接住就係來到中式風格既文曲里公園（所以如果係鐘意影相既朋友踩將軍澳其實性價比真係幾高）。同樣地，大家如果來到既話都要記得推車入，做個乖乖既小寶寶👍🏻
相比起常寧街公園，文曲里公園比較大而且景觀更多樣化，呢度有涼亭、小橋、魚塘、竹林、圓拱門，數之不盡的取景元素。當然大家如果不是鐘意瘋狂影相既話，來這裡靜靜坐一下都是絕佳的選擇。
其實呢個公園好大，不過每次我地來（搞活動）基本上都係停係魚塘邊就沒有再入去，因為每次我地都很趕🥹。大家就代我地去好好遊玩一番，有靚相就 share比我地啦！
後記
將軍澳其實有好多地方都好靚好好踩，雖然大家一定會覺得沙田大圍大埔個 d 傳統單車徑先好玩，不過將軍澳勝在少人，同埋個 feel 係唔同既，如果你想同屋企人/摯愛來靜靜地玩返日，咁跟住我地呢個遊記會係一個唔錯既選擇。其實踩單車係睇你本身既心理預期，如果你預左來悠閒慢踩一日，可以打卡影相，食下野既話，咁自然就會踩得好玩同開心~
我地相信將軍澳一定仲有好多其他好玩好踩又值得去既地方，日後有新 update 既話一定會再話比大家知😎
單車租借 (詳情)
取車/ 還車地點：
將軍澳@Ocean Popwalk 海天晉滙
營業時間：
逢星期六日及公眾假期
11am-7pm
🚲成人車租金 Rent
1hr / 2hr / 全日
成人(有波段) $50 / $100 / $150
成人(單速^) $40 / $80 / $120
1hr / 2hr / 全日
四輪車(可拆輔助輪) $35 / $70 / $105
平衡車 $25 / $50 / $75
溫馨提示
-大家要準備好防曬 👒☀️
-蚊怕水也是必備的 🦟
-呢區有好多野食，周圍隨便都可以停車就食到 🍱🍡🍲
-強烈建議大家帶相機，真係有好多位影相 📸
-同我地租借單車有 free parking 🚗
-我地既單車係來自日本東京既 tokyobike 復古單車 🇯🇵
-踩完如果買單車，租金可以作折扣優惠 💰
-如果好天氣既日子，強烈建議大家預先 book 定會好 d 😎